1. පුඤ්ඤේනානේන මේ යාවජීවං සබ්බත්ථ සබ්බදා,
සුඛීභවෙය්‍යං නිද්දුක්ඛො අඛ්‍යාපජ්ඣෝ භවෙය්‍යහං.
.
2. මය්හං හිතා ච වේරා ච මජ්ඣත්තා සබ්බ පාණිනෝ,
සුඛී අවේරා නිද්දුක්ඛා අඛ්‍යාපජ්ඣා ච හොන්තු තේ.
.
3. තථා අස්මිං ඝරාරාමේ ගාමපබ්බතපාදපේ,
රජ්ජේ “පි” මස්ස දීපස්ස ගාමක්ඛෙත්ත වනාදිසු.
.
4. චක්ඛවාළස්සි “මස්සා” පි මහාදීප චතුස්වපි,
ද්විසහස්ස ඛුද්දදීපේසු තේසුගාමාදිකේසු ච.
.
5. තථා සමන්තානන්තේසු චක්කවාළේසු තේසුපි,
හෙට්ඨා අවීචිතෝ යාවභවග්ගා දසදිසාසුපි.
.
6. ඛත්තියා බ්‍රාහ්මණා වෙස්සා සුද්දා චණ්ඩාල පුක්කුසා,
මනුස්සා අමනුස්සා ච සුපණ්ණා ච අසේසකා.
.
7. සබ්බේ අපාද ද්විපදා චතුප්පාද බහුප්පදා,
තේසු භූතේසු සබ්බේසු පුමා සබ්බාපි ඉත්ථියෝ.
.
8. සබ්බේ දිට්ඨා අදිට්ඨා ච සබ්බේ දිඝා ච රස්සකා,
සබ්බේ සුඛුම ථුලා ච හීන මජ්ඣිම උත්තමා.
.
9. දූරට්ඨා’පි අදූරට්ඨා සන්තිකට්ඨා ච කේවලා,
යේ පඤ්ච ගතිකා සත්තා සබ්බේ තේ චතුයෝනිකා
.
10. යේ සබ්බේ පාණිනෝ ජීවා භූතා සත්තා ච සබ්බදා,
සුඛී අවේරා නිද්දුක්ඛා අඛ්‍යාපජ්ඣා ච හොන්තු තේ.
.
11. නාගා ච සබ්බේ පාතාලේ අසුරාචා’ සුරේ පුරේ,
නරකේ යමරාජානෝ නේරයිකා විඝාතිනෝ.
.
12. තිරච්ඡානගතා සබ්බේ පේතා පේත භවේසු ච,
අසුරකායා ච සබ්බේ ච සබ්බේ ච භූ නිස්සිතාපි ච.
.
13. සුඛිතා හොන්තු නිද්දුක්ඛා අවේරා ච අනාමයා,
දීඝායුකා අඤ්ඤමඤ්ඤං පියා පප්පොන්තු නිබ්බුතිං.
.
14. විහාරේසු ච සබ්බේසු චේතියේ පටිමාඝරේ,
බෝධිරුක්ඛෙසු සබ්බේසු සේසරුක්ඛෙ වනේසු ච.
.
15. පබ්බතේසු ච සබ්බේසු කන්දරේ නිජ්ඣරේ තථා,
නදී ගංගා තටාකේසු වාපි පොක්ඛරණීසු ච.
.
16. ජලාසයේසු සබ්බේසු සමුද්දේසු ච දේවතා,
සබ්බේපි දේවතා නාගා සබ්බේ සත්තා ජලාසයා.
.
17. සුඛිතා හොන්තු නිද්දුක්ඛා අවේරා ච අනාමයා,
දීඝායුකා අඤ්ඤමඤ්ඤං පියා පප්පොන්තු නිබ්බුතිං.
.
18. ථලාසයා ච සබ්බේහි සබ්බේ සත්තා වනාසයා,
රුක්ඛෙසු දේවතා සබ්බා විමාන වන දේවතා.
.
19. සුඛිතා හොන්තු නිද්දුක්ඛා ආවේරාච අනාමයා,
දීඝායුකා අඤ්ඤමඤ්ඤං පියා පප්පොන්තු නිබ්බුතිං.
.
20. භුම්මට්ඨා දේවතා සබ්බා ආකාසට්ඨා ච දේවතා,
චාතුම්මහාරාජිකා ච තාවතිංසා ච දේවතා.
.
21. යාමා ච තුසිතා දේවා නිම්මාණරතිනෝ පි ච,
පරේහි නිම්මිතා සබ්බා දේවා ච වසවත්තිනෝ.
.
22. සබ්බේ බ්‍ර‍හ්මපාරිසජ්ජා තථා බ්‍ර‍හ්මපුරෝහිතා,
මහා බ්‍ර‍හ්මා පරිත්තාභා අප්පමාණාහ නාමකා.
.
23. ආභස්සරා ච බ්‍ර‍හ්මානෝ පරිත්තසුභ නාමකා,
අප්පමාණ සුභාචේව සුභකිණ්ණක නාමකා.
.
24. වේහප්ඵලා සඤ්ඤසත්තා අවිහාතප්පිකාපි ච,
සුදස්සා ච සුදස්සී ච අකනිට්ඨා ච රූපිනෝ.
.
25. අකාසානඤ්චායතන විඤ්ඤාණඤ්චායතනානිච
ආකිඤ්චඤ්ඤායතන නේවසඤ්ඤිනාසඤ්ඤිනෝපිච.
.
26. සබ්බේපි තේ බහූ සත්තා පාණභූතා ච පුග්ගලා,
සුඛිතා හොන්තු නිද්දුක්ඛා අවේරා ච අනාමයා.
.
27. යේහි යා සුඛසම්පත්ති අලද්ධානං ලභන්තු තෙ,
ථිරා ච හොන්තු ලද්ධාය සුඛසම්පත්තියා සදා.
.
28. විජ්ජා සම්පත්ති භෝගෙහි පවඩ්ඪන්තු යසස්සිනෝ,
පරිවාර බලප්පත්තා භයෝ’ පද්දව වජ්ජිතා.
.
29. සුඛිලා සුඛ සම්භාසා අඤ්ඤමඤ්ඤං හිතේසිනෝ,
මෝදන්තු සුඛිතා සබ්බේ මාකඤ්චි පාපමාගමා.
.
30. සද්ධා පාමොජ්ජ බහුලා දානසීල බහුස්සවා,
ගුණභූසිතසන්තානං ආයුං පාලෙන්ත්වනාමයා.
.
31. සම්මාදිට්ඨිං පුරෝධාය සද්ධම්ම පටිපත්තියා,
ආරාධෙන්තු හිතෝපාය මච්චන්ත සුඛ සාධනං.
.
32. ඉති නානප්පකාරේන සත්තේසු හිත මානසං,
මාතා ච පියපුත්තම්හි පවත්තෙය්යං නිරන්තරං.
.
33. භවග්ගුපාදාය අවීචි හෙට්ඨතෝ,
එත්ථන්තරෙ සත්ත කායූපපන්නා,
රූපී අරූපී ච අසඤ්ඤි සඤ්ඤිනො
දුක්ඛාපමුඤ්චන්තු ඵුසන්තු නිබ්බුතිං.
.
34. ඉමම්හි මෙත්තං පටිවාස රඤ්ඤෝ
භාවෙති පාතෝ ච දිවා ච රත්තිං,
සුඛං සුපච්චේ සුඛං පබුජ්ඣතී
සුත්තේසු පාපං සුපිනං න පස්සති.
.
35. පියෝ ච සෝ හොති නරාමරානං
රක්ඛන්ති තං දේවගණාපි නිච්චං,
පරප්පයුත්තා ච විසග්ගිසත්ථං,
න තම්පි ඛාධෙතු මලං සදාපි.
.
36. චිත්තං සමාධිං තුවටඤ්ච ගච්ඡති
වණණෝමුඛෙවස්ස ච විප්පසීදති,
අමූළ්හකො යේව කරොති කාලං
ආයුක්ඛයේ බ්‍ර‍හ්ම නිවාස ගාමිණී,
.
37. අස්මිං විහාර ඝරපබ්බත රුක්ඛගාමේ
සබ්බේසු දීප නගරේසුපි චක්කවාළේ,
දේවාසුරා ගරුඩ රක්ඛස නාග යක්ඛා
රක්ඛන්තු මං සකනුභාව බලේන නිච්චං.