අඩුවක් නැති සකල ධර්ම සමූහය තත්ත්වාකාරයෙන් දැන සිටින බැවින් කිසිවකු ඉදිරියේ බියක් නැත්තා වූ සකලවාදපථයන් ඉක්මවා සිටින්නා වූ තුන් ලොවට පහනක් වැනි වූ දිව්‍ය බ්‍රහ්මයන්ට පවා නො කළ හැකි දෑ කිරීමෙහි සමත් වූ සකලඥෙය්‍යාවරණයන් ප්‍රහාණය කළා වූ අපරිමිත විෂය ඇත්තා වූ ශාස්තෲන් වහන්සේ නමදිමි.

තිලෝකනාථයන් වහන්සේගෙන් හටගත්තා වු සකල භයයන් දුරුකරන්නා වූ පරිශුද්ධ විද්‍යචරණ ඇති උත්තමයන් විසින් සෙව්නා ලද්දා වූ ප්‍රපඤ්චයන් හා සංයෝජන බන්ධනයන් සිඳින්නා වූ සූක්ෂම වූ සුදුර්දශ වූ ධර්මරත්නය නමදිමි.

යම් සංඝ රත්නයක් කෙරෙහි සිතපහදා ගත් පමණකින් ම ද සත්වයෝ සකල දුඃඛයාගේ ක්ෂයය වූ නිර්වාණය ලබත් ද ඉතා දුර සිට වුව ද ප්‍රත්‍යන් ගෙනැවිත් පිදීමට සුදුසු වූ සන්සුන් ඉඳුරන් ඇත්තා වූ බුදුරජාණන් වහන්සේගේ ශ්‍රාවක සංඝයා වඳිමි.