අධික ද්වේෂයෙන් රාක්‍ෂසව උපදනා පරිදි කෙසේද? යත්:-
අතීතයෙහි වාසුදෙව, බලදෙවාදී දසබෑරාජකුමාරවරුන් හංසවතී නම් නුවර මල්ලයුද්ධයට බටකල්හි ඔවුන් අතුරෙන් බලදෙව නම් රාජකුමාරයෝ මුට්ඨිමල්ලව නම් මල්ලවයා බැඳගෙන මිරිකා මරනට වන්හ. එසඳ මුට්ඨිමල්ලවයා මම මල්ලවයෙක් නොවෙමියි කීය. ඔහු එසේ කීවත් බලදෙව නම් රාජකුමාරයෝ තා මල්ලව නියාවත් මල්ලව නො වන නියාවත් මම නො දන්මියි, ඔහුගේ බස් නො ගිවිස මිරිකා මරා පූහ. ඒ මල්ලවයා මියන ගමනේ ද්වේෂයෙන් තා කා මැරිය හෙම්වයි පතා මිය ගොස් කාලමත්තිකා නම් අරණ්‍යයෙහි රාක්‍ෂසව ඉපැද ඒ බලදේව නම් රාජකුමාරයන් තමා කළ ප්‍රාර්ථනා නියාවට ම කා මරුයේය. මෙහි විස්තර සානජාතකයෙන් දත යුත්තේය. මෙසේ අධික ද්වේෂය කිරීමෙන් රාක්‍ෂසව උපදනාහ.