මානයෙන් වඳුරුව උපදනා පරිදි කෙසේද යත්:-
රජගහනුවර ගොපකමොග්ගල්ලාන නම් එක් බමුණෙක් එක්දවසක් කසයින් මහතෙරුන්වහන්සේ ගිජුකුළුපව්වෙන් වඩනා දැක මේ මහාකාලවඳුරකු වැන්නේයයි කීය. බුදුරජාණන් වහන්සේ ඔහුගේ බස් අසා ඉදින් මේ තෙම කසයින් මහතෙරුන් ක්‍ෂමාකැරවූයේ වී නම් යහපත් වන්නේය. ක්‍ෂමා නො කැරවූයේ වී නම් මේ වේළුවනයෙහි මහාකාලවඳුරුව උපදනේ වේදැයි වදාළසේක. බමුණු එපවත් අසා මානයෙන් ක්‍ෂමා නො කරවා ශ්‍රමණභවත් ගෞතමයන් වහන්සේ කීවා ඒකාන්තයෙන් සැබෑ වේමැයි මා වඳුරුව උපන්කල කෑහැක්කේවේ දැයි වේළුවනයෙහි නොයෙක් ඵලරුක් හිඳුවා රැකවල් ලැවීය. පසුව ඒ බමුණු කල්යාමකින් මියගොස් ඒ වනයෙහි මහාකාලවඳුරුව උපන්නේය. මෙහි විස්තර මැදුම්සඟියෙහි ගොපකමොග්ගල්ලානසූත්‍රයෙන් දතයුත්තේය. මෙසේ මානය කිරීමෙන් මහාකාල වඳුරුව උපදනාහ.