ඉමෙ ඛො පනාය්‍යායො ඡසට්ඨිසතා පාචිත්තියා ධම්මා උද්දෙසං ආගච්ඡන්ති.
1. යා පන භික්ඛුනී ලසුණං ඛාදෙය්‍ය, පාචිත්තියං.
2. යා පන භික්ඛුනී සම්බාධෙ ලොමං සංහරාපෙය්‍ය, පාචිත්තියං.
3. තලඝාතකෙ පාචිත්තියං.
4. ජතුමට්ඨකෙ[1] පාචිත්තියං.
5. උදකසුද්ධිකං පන භික්ඛුනියා ආදියමානාය ද්වංගුලපබ්බපරමං ආදාතබ්බං. තං අතික්කාමෙන්තියා, පාචිත්තියං.
6. යා පන භික්ඛුනී භික්ඛුස්ස භුඤ්ජන්තස්ස පානීයෙන වා විධූපනෙන වා උපතිට්ඨෙය්‍ය, පාචිත්තියං.
7. යා පන භික්ඛුනී ආමකදඤ්ඤං විඤ්ඤත්වා වා විඤ්ඤාපෙත්වා වා භජ්ජිත්වා වා භජ්ජාපෙත්වා වා කොට්ටෙත්වා වා කොට්ටාපෙත්වා වා පචිත්වා වා පචාපෙත්වා වා භුඤ්ජෙය්‍ය, පාචිත්තියං.
8. යා පන භික්ඛුනී උච්චාරං වා පස්සාවං වා සංකාරං වා විඝාසං වා තිරොකුඩ්ඩෙ වා තිරොපාකාරෙ වා ඡඩ්ඩෙය්‍ය වා ඡඩ්ඪාපෙය්‍ය වා, පාචිත්තියං.
9. යා පන භික්ඛුනී උච්චාරං වා පස්සාවං වා සංකාරං වා විඝාසං වා හරිතෙ ඡඩ්ඪෙය්‍ය වා ඡඩ්ඪාපෙය්‍ය වා, පාචිත්තියං.
10. යා පන භික්ඛුනී නච්චං වා ගීතං වා වාදිතං වා දස්සනාය ගච්ඡෙය්‍ය පාචිත්තියං.
ලසුණවග්ගො පඨමො
1. යා පන භික්ඛුනී රත්තන්ධකාරෙ අප්පදීපෙ පුරිසෙන සද්ධිං එකෙනෙකා සන්තිට්ඨෙය්‍ය වා සල්ලපෙය්‍ය වා, පාචිත්තියං.
2. යා පන භික්ඛුනී පටිච්ඡන්නෙ ඔකාසෙ පුරිසෙන සද්ධිං එකෙනෙකා සන්තිට්ඨෙය්‍ය වා සල්ලපෙය්‍ය වා, පාචිත්තියං.
3. යා පන භික්ඛුනී අජ්ඣොකාසෙ පුරිසෙන සද්ධිං එකෙනෙකා සන්තිට්ඨෙය්‍ය වා සල්ලපෙය්‍ය වා, පාචිත්තියං.
4. යා පන භික්ඛුනී රථිකාය වා බ්‍යුහෙ වා සිංඝාටකෙ වා පුරිසෙන සද්ධිං එකෙනෙකා සන්තිට්ඨෙය්‍ය වා සල්ලපෙය්‍ය වා නිකණ්ණිකං වා ජප්පෙය්‍ය, දුතියිකං වා භික්ඛුනිං උය්‍යොජෙය්‍ය, පාචිත්තියං.
5. යා පන භික්ඛුනී පුරෙභත්තං කුලානි උපසංකමිත්වා ආසනෙ නිසීදිත්වා සාමිකෙ අනාපුච්ඡා පක්කමෙය්‍ය, පාචිත්තියං.
6. යා පන භික්ඛුනී පච්ඡාභත්තං කුලානි උපසංකමිත්වා සාමිකෙ අනාපුච්ඡා ආසනෙ අභිනිසීදෙය්‍ය වා අභිනිපජ්ජෙය්‍ය වා, පාචිත්තියං.
7. යා පන භික්ඛුනී විකාලෙ කුලානි උපසංකමිත්වා සාමිකෙ අනාපුච්ඡා සෙය්‍යං සන්ථරිත්වා වා සන්ථරාපෙත්වා වා අභිනිසීදෙය්‍ය වා අභිනිපජ්ජෙය්‍ය වා, පාචිත්තියං.
8. යා පන භික්ඛුනී දුග්ගහිතෙන දූපධාරිතෙන පරං අජ්ඣාපෙය්‍ය, පාචිත්තියං.
9. යා පන භික්ඛුනී අත්තානං වා පරං වා නිරයෙන වා බ්‍රහ්මචරියෙන වා අභිසපෙය්‍ය, පාචිත්තියං.
10. යා පන භික්ඛුනී අත්තානං වධිත්වා වධිත්වා රොදෙය්‍ය, පාචිත්තියං.
අන්ධකාරවග්ගො දුතියො
1. යා පන භික්ඛුනී නග්ගා නහායෙය්‍ය, පාචිත්තියං.
2. උදකසාටිකං පන භික්ඛුනියා කාරයමානාය පමාණිකා කාරෙතබ්බා, තත්‍රිදං පමාණං: දීඝසො චතස්සො විදත්ථියො සුගතවිදත්ථියා, තිරියං ද්වෙ විදත්ථියො. තං අතික්කාමෙන්තියා, භෙදනකං පාචිත්තියං.
3. යා පන භික්ඛුනී භික්ඛුනියා චීවරං විසිබ්බෙත්වා වා විසිබ්බාපෙත්වා වා සා පච්ඡා අනන්තරායිකිනී නෙව සිබ්බෙය්‍ය, න සිබ්බාපනාය උස්සුක්කං කරෙය්‍ය අඤ්ඤත්‍ර චතූහපඤ්චාහා, පාචිත්තියං.
4. යා පන භික්ඛුනී පඤ්චාහිකං සංඝාටිචාරං[2] අතික්කාමෙය්‍ය, පාචිත්තියං.
5. යා පන භික්ඛුනී චීවරසංකමනීයං ධාරෙය්‍ය, පාචිත්තියං.
6. යා පන භික්ඛුනී ගණස්ස චීවරලාභං අන්තරායං කරෙය්‍ය, පාචිත්තියං.
7. යා පන භික්ඛුනී ධම්මිකං චීවරවිභංගං පටිබාහෙය්‍ය, පාචිත්තියං.
8. යා පන භික්ඛුනී අගාරිකස්ස වා පරිබ්බාජකස්ස වා පරිබ්බාජිකාය වා සමණචීවරං දදෙය්‍ය, පාචිත්තියං.
9. යා පන භික්ඛුනී දුබ්බලචීවරං පච්චාසාය චීවරකාලසමයං අතික්කාමෙය්‍ය, පාචිත්තියං.
10. යා පන භික්ඛුනී ධම්මිකං කඨිනුද්ධාරං පටිබාහෙය්‍ය, පාචිත්තියං.
නග්ගවග්ගො තතියො
1. යා පන භික්ඛුනියො ද්වෙ එකමඤ්චෙ තුවට්ටෙය්‍යුං, පාචිත්තියං.
2. යා පන භික්ඛුනියො ද්වෙ එකත්ථරණපාවුරණා තුවට්ටෙය්‍යුං, පාචිත්තියං.
3. යා පන භික්ඛුනී සඤ්චිච්ච අඵාසුං කරෙය්‍ය, පාචිත්තියං.
4. යා පන භික්ඛුනී දුක්ඛිතං සහජීවිනිං නෙව උපට්ඨෙය්‍ය න උපට්ඨාපනාය උස්සුක්කං කරෙය්‍ය, පාචිත්තියං.
5. යා පන භික්ඛුනී භික්ඛුනියා උපස්සයං දත්වා කුපිතා අනත්තමනා නික්කඩ්ඪෙය්‍ය වා නික්කඩ්ඪාපෙය්‍ය වා, පාචිත්තියං.
6. යා පන භික්ඛුනී සංසට්ඨා විහරෙය්‍ය ගහපතිනා වා ගහපතිපුත්තෙන වා. සා භික්ඛුනී භික්ඛුනීහි එවමස්ස වචනීයා ‘මාය්‍යෙ සංසට්ඨා විහරි ගහපතිනා පි ගහපතිපුත්තෙන පි, විවිච්චාය්‍යෙ විවෙකඤ්ඤේව භගිනියා සංඝො වණ්ණෙතී’ති. එවං ච පන සා භික්ඛුනී භික්ඛුනීහි වුච්චමානා තථෙව පග්ගණ්හෙය්‍ය, සා භික්ඛුනී භික්ඛුනීහි යාවතතියං සමනුභාසිතබ්බා තස්ස පටිනිස්සග්ගාය. යාවතතියඤ්චෙ සමනුභාසියමානා තං පටිනිස්සජ්ජෙය්‍ය, ඉච්චෙතං කුසලං. නො චෙ පටිනිස්සජ්ජෙය්‍ය, පාචිත්තියං.
7. යා පන භික්ඛුනී අන්තොරට්ඨෙ සාසංක සම්මතෙ සප්පටිභයෙ අසත්ථිකා චාරිකං චරෙය්‍ය, පාචිත්තියං.
8. යා පන භික්ඛුනී තිරොරට්ඨෙ සාසංක සම්මතෙ සප්පටිභයෙ අසත්ථිකා චාරිකං චරෙය්‍ය, පාචිත්තියං.
9. යා පන භික්ඛුනී අන්තොවස්සං චාරිකං චරෙය්‍ය, පාචිත්තියං.
10. යා පන භික්ඛුනී වස්සං වුත්ථා[3] චාරිකං න පක්කමෙය්‍ය අන්තමසො ඡප්පඤ්චයොජනානිපි, පාචිත්තියං.
තුවට්ටවග්ගො චතුත්ථො
1. යා පන භික්ඛුනී රාජාගාරං වා චිත්තාගාරං වා ආරාමං වා උය්‍යානං වා පොක්ඛරණිං වා දස්සනාය ගච්ඡෙය්‍ය, පාචිත්තියං.
2. යා පන භික්ඛුනී ආසන්දිං වා පල්ලංකං වා පරිභුඤ්ජෙය්‍ය, පාචිත්තියං.
3. යා පන භික්ඛුනී සුත්තං කන්තෙය්‍ය, පාචිත්තියං.
4. යා පන භික්ඛුනී ගිහිවෙය්‍යාවච්චං කරෙය්‍ය, පාචිත්තියං.
5. යා පන භික්ඛුනී භික්ඛුනියා ‘එහාය්‍යෙ ඉමං අධිකරණං වූපසමෙහී’ති වුච්චමානා ‘සාධු’ ති පටිස්සුණිත්වා සා පච්ඡා අනන්තරායිකිනී නෙව වූපසමෙය්‍ය න වූපසමාය උස්සුක්කං කරෙය්‍ය, පාචිත්තියං.
6. යා පන භික්ඛුනී අගාරිකස්ස වා පරිබ්බාජකස්ස වා පරිබ්බාජිකාය වා සහත්ථා ඛාදනීයං වා භොජනීයං වා දදෙය්‍ය, පාචිත්තියං.
7. යා පන භික්ඛුනී ආවසථචීවරං අනිස්සජ්ජිත්වා පරිභුඤ්ජෙය්‍ය, පාචිත්තියං.
8. යා පන භික්ඛුනී ආවසථං අනිස්සජ්ජිත්වා චාරිකං පක්කමෙය්‍ය, පාචිත්තියං.
9. යා පන භික්ඛුනී තිරච්ඡානවිජ්ජං පරියාපුණෙය්‍ය, පාචිත්තියං.
10. යා පන භික්ඛුනී තිරච්ඡානවිජ්ජං වාචෙය්‍ය, පාචිත්තියං.
චිත්තාගාරවග්ගො පඤ්චමො
1. යා පන භික්ඛුනී ජානං සභික්ඛුකං ආරාමං අනාපුච්ඡා පවිසෙය්‍ය, පාචිත්තියං.
2. යා පන භික්ඛුනී භික්ඛුං අක්කොසෙය්‍ය වා පරිභාසෙය්‍ය වා, පාචිත්තියං.
3. යා පන භික්ඛුනී චණ්ඩීකතා ගණං පරිභාසෙය්‍ය, පාචිත්තියං.
4. යා පන භික්ඛුනී නිමන්තිතා වා පවාරිතා වා ඛාදනීයං වා භොජනීයං වා ඛාදෙය්‍ය වා භුඤ්ජෙය්‍ය වා, පාචිත්තියං.
5. යා පන භික්ඛුනී කුලමච්ඡරිනී අස්ස, පාචිත්තියං.
6. යා පන භික්ඛුනී අභික්ඛුකෙ ආවාසෙ වස්සං වසෙය්‍ය, පාචිත්තියං.
7. යා පන භික්ඛුනී වස්සං වුත්ථා උභතො සංඝෙ තීහි ඨානෙහි න පවාරෙය්‍ය දිට්ඨෙන වා සුතෙන වා පරිසංකාය වා, පාචිත්තියං.
8. යා පන භික්ඛුනී ඔවාදාය වා සංවාසාය වා න ගච්ඡෙය්‍ය, පාචිත්තියං.
9. අන්වද්ධමාසං පන භික්ඛුනියා භික්ඛු සංඝතො ද්වෙ ධම්මා පච්චාසීසිතබ්බා උපොසථපුච්ඡකඤ්ච ඔවාදූපසංකමනඤ්ච. තං අතික්කාමෙන්තියා, පාචිත්තියං.
10. යා පන භික්ඛුනී පසාඛෙ ජාතං ගණ්ඩං වා රුචිතං වා අනපලොකෙත්වා සංඝං වා ගණං වා පුරිසෙන සද්ධිං එකෙනෙකා භෙදාපෙය්‍ය වා ඵාලාපෙය්‍ය වා ධොවාපෙය්‍ය වා ආලිම්පාපෙය්‍ය වා බන්ධාපෙය්‍ය වා මොචාපෙය්‍ය වා, පාචිත්තියං.
ආරාමවග්ගො ඡට්ඨො
1. යා පන භික්ඛුනී ගබ්භිනිං වුට්ඨාපෙය්‍ය, පාචිත්තියං.
2. යා පන භික්ඛුනී පායන්තිං වුට්ඨාපෙය්‍ය, පාචිත්තියං.
2. යා පන භික්ඛුනී පායන්තිං වුට්ඨාපෙය්‍ය, පාචිත්තියං.
3. යා පන භික්ඛුනී ද්වෙ වස්සානි ඡසු ධම්මෙසු අසික්ඛිතසික්ඛං සික්ඛමානං වුට්ඨාපෙය්‍ය, පාචිත්තියං.
4. යා පන භික්ඛුනී ද්වෙ වස්සානි ඡසු ධම්මෙසු සික්ඛිතසික්ඛං සික්ඛමානං සංඝෙන අසම්මතං වුට්ඨාපෙය්‍ය, පාචිත්තියං.
5. යා පන භික්ඛුනී ඌනද්වාදස වස්සං ගිහිගතං වුට්ඨාපෙය්‍ය, පාචිත්තියං.
6. යා පන භික්ඛුනී පරිපුණ්ණද්වාදසවස්සං ගිහිගතං ද්වෙ වස්සානි ඡසු ධම්මෙසු අසික්ඛිතසික්ඛං වුට්ඨාපෙය්‍ය, පාචිත්තියං.
7. යා පන භික්ඛුනී පරිපුණ්ණද්වාදසවස්සං ගිහිගතං ද්වෙවස්සානි ඡසු ධම්මෙසු සික්ඛිතසික්ඛං සංඝෙන අසම්මතං වුට්ඨාපෙය්‍ය, පාචිත්තියං.
8. යා පන භික්ඛුනී සහජීවිනිං වුට්ඨාපෙත්වා ද්වෙවස්සානි නෙව අනුග්ගණ්හෙය්‍ය න අනුග්ගණ්හාපෙය්‍ය, පාචිත්තියං.
9. යා පන භික්ඛුනී වුට්ඨාපිතං පවත්තිනිං ද්වෙවස්සානි නානුබන්ධෙය්‍ය, පාචිත්තියං.
10. යා පන භික්ඛුනී සහජීවිනිං වුට්ඨාපෙත්වා නෙව වූපකාසෙය්‍ය න වූපකාසාපෙය්‍ය අන්තමසො ඡප්පඤ්ච යොජනානිපි, පාචිත්තියං.
ගබ්භිනීවග්ගො සත්තමො
1. යා පන භික්ඛුනී ඌනවීසති වස්සං කුමාරිභූතං වුට්ඨාපෙය්‍ය, පාචිත්තියං.
2. යා පන භික්ඛුනී පරිපුණ්ණවීසතිවස්සං කුමාරිභූතං ද්වෙවස්සානි ඡසු ධම්මෙසු අසික්ඛිතසික්ඛං වුට්ඨාපෙය්‍ය, පාචිත්තියං.
3. යා පන භික්ඛුනී පරිපුණ්ණවීසති වස්සං කුමාරිභූතං ද්වෙවස්සානි ඡසු ධම්මෙසු සික්ඛිතසික්ඛං සංඝෙන අසම්මතං වුට්ඨාපෙය්‍ය, පාචිත්තියං.
4. යා පන භික්ඛුනී ඌනද්වාදසවස්සා වුට්ඨාපෙය්‍ය, පාචිත්තියං.
5. යා පන භික්ඛුනී පරිපුණ්ණද්වාදසවස්සා සංඝෙන අසම්මතා වුට්ඨාපෙය්‍ය, පාචිත්තියං.
6. යා පන භික්ඛුනී ‘අලං තාව තෙ අය්‍යෙ වුට්ඨාපිතෙනා’ති වුච්චමානා ‘සාධු’ති පටිස්සුණිත්වා පච්ඡා ඛීය්‍යනධම්මං ආපජ්ජෙය්‍ය, පාචිත්තියං.
7. යා පන භික්ඛුනී සික්ඛමානං ‘සචෙ මෙ ත්වං අය්‍යෙ චීවරං දස්සසි, එවාහං තං වුට්ඨාපෙස්සාමී’ති වත්වා සා පච්ඡා අන්තරායිකිනී නෙව වුට්ඨාපෙය්‍ය න වුට්ඨාපනාය උස්සුක්කං කරෙය්‍ය, පාචිත්තියං.
8. යා පන භික්ඛුනී සික්ඛමානං ‘සචෙ මං ත්වං අය්‍යෙ ද්වෙවස්සානි අනුබන්ධිස්සසි, එවාහ තං වුට්ඨාපෙස්සාමී’ති වත්වා සා පච්ඡා අනන්තරායිකිනී නෙව වුට්ඨාපෙය්‍ය, න වුට්ඨාපනාය උස්සුක්කං කරෙය්‍ය, පාචිත්තියං.
9. යා පන භික්ඛුනී පුරිසසංසට්ඨං කුමාරකසංසට්ඨං චණ්ඩිං සොකාවාසං සික්ඛමානං වුට්ඨාපෙය්‍ය, පාචිත්තියං.
10. යා පන භික්ඛුනී මාතාපිතූහි වා සාමිකෙන වා අනනුඤ්ඤාතං සික්ඛමානං වුට්ඨාපෙය්‍ය, පාචිත්තියං.
11. යා පන භික්ඛුනී පාරිවාසික ඡන්ද දානෙන සික්ඛමානං වුට්ඨාපෙය්‍ය, පාචිත්තියං.
12. යා පන භික්ඛුනී අනුවස්සං වුට්ඨාපෙය්‍ය, පාචිත්තියං.
13. යා පන භික්ඛුනී එකං වස්සං ද්වෙ වුට්ඨාපෙය්‍ය, පාචිත්තියං.
කුමාරිභූතවග්ගො අට්ඨමො
1. යා පන භික්ඛුනී අගිලානා ඡත්තුපාහනං ධාරෙය්‍ය, පාචිත්තියං.
2. යා පන භික්ඛුනී අගිලානා යානෙන යායෙය්‍ය, පාචිත්තියං.
3. යා පන භික්ඛුනී සංඝාණිං ධාරෙය්‍ය, පාචිත්තියං.
4. යා පන භික්ඛුනී ඉත්ථාලංකාරං ධාරෙය්‍ය, පාචිත්තියං.
5. යා පන භික්ඛුනී ගන්ධවණ්ණකෙන නහායෙය්‍ය, පාචිත්තියං.
6. යා පන භික්ඛුනී වාසිතකෙන පිඤ්ඤාකෙන නහායෙය්‍ය, පාචිත්තියං.
7. යා පන භික්ඛුනී භික්ඛුනියා උම්මද්දාපෙය්‍ය වා පරිමද්දාපෙය්‍ය වා, පාචිත්තියං.
8. යා පන භික්ඛුනී සික්ඛමානාය උම්මද්දාපෙය්‍ය වා පරිමද්දාපෙය්‍ය වා, පාචිත්තියං.
9. යා පන භික්ඛුනී සාමණෙරියා උම්මද්දාපෙය්‍ය වා පරිමද්දාපෙය්‍ය වා, පාචිත්තියං.
10. යා පන භික්ඛුනී ගිහිනියා උම්මද්දාපෙය්‍ය වා පරිමද්දාපෙය්‍ය වා, පාචිත්තියං.
11. යා පන භික්ඛුනී භික්ඛුස්ස පුරතො අනාපුච්ඡා ආසනෙ නිසීදෙය්‍ය, පාචිත්තියං.
12. යා පන භික්ඛුනී අනෝකාසකතං භික්ඛුං පඤ්හං පුච්ඡෙය්‍ය, පාචිත්තියං.
13. යා පන භික්ඛුනී අසංකච්චිකා ගාමං පවිසෙය්‍ය, පාචිත්තියං.
ඡත්තුපාහනවග්ගො නවමො.
1. සම්පජාන මුසාවාදෙ පාචිත්තියං.
2. ඔමසවාදෙ පාචිත්තියං.
3. භික්ඛුනී පෙසුඤ්ඤෙ පාචිත්තියං.
4. යා පන භික්ඛුනී අනුපසම්පන්නං පදසො ධම්මං වාචෙය්‍ය, පාචිත්තියං.
5. යා පන භික්ඛුනී අනුපසම්පන්නාය උත්තරි දිරත්ත තිරත්තං සහසෙය්‍යං කප්පෙය්‍ය, පාචිත්තියං.
6. යා පන භික්ඛුනී පුරිසෙන සහසෙය්‍යං කප්පෙය්‍ය, පාචිත්තියං.
7. යා පන භික්ඛුනී පුරිසස්ස උත්තරි ඡප්පඤ්ච වාචාහි ධම්මං දෙසෙය්‍ය අඤ්ඤත්‍ර විඤ්ඤුනා ඉත්ථිවිග්ගහෙන, පාචිත්තියං.
8. යා පන භික්ඛුනී අනුපසම්පන්නාය උත්තරිමනුස්සධම්මං ආරොචෙය්‍ය භූතස්මිං, පාචිත්තියං.
9. යා පන භික්ඛුනී භික්ඛුනියා දුට්ඨුල්ලං ආපත්තිං අනුපසම්පන්නාය ආරොචෙය්‍ය අඤ්ඤත්‍ර භික්ඛුනී සම්මුතියා, පාචිත්තියං.
10. යා පන භික්ඛුනී පඨවිං ඛණෙය්‍ය වා ඛණාපෙය්‍ය වා, පාචිත්තියං.
මුසාවාදවග්ගො දසමො.
1. භූතගාමපාතබ්‍යතාය පාචිත්තියං.
2. අඤ්ඤවාදකෙ විහෙසකෙ පාචිත්තියං.
3. උජ්ඣාපනකෙ ඛීය්‍යනකෙ පාචිත්තියං.
4. යා පන භික්ඛුනී සංඝිකං මඤ්චං වා පීඨං වා භිසිං වා කොච්ඡං වා අජ්ඣොකාසෙ සන්ථරිත්වා වා සන්ථරාපෙත්වා වා තං පක්කමන්තී නෙව උද්ධරෙය්‍ය න උද්ධරාපෙය්‍ය, අනාපුච්ඡං වා ගච්ඡෙය්‍ය, පාචිත්තියං.
5. යා පන භික්ඛුනී සංඝිකෙ විහාරෙ සෙය්‍යං සන්ථරිත්වා වා සන්ථරාපෙත්වා වා තං පක්කමන්තී නෙව උද්ධරෙය්‍ය න උද්ධරාපෙය්‍ය, අනාපුච්ඡං වා ගච්ඡෙය්‍ය, පාචිත්තියං.
6. යා පන භික්ඛුනී සංඝිකෙ විහාරෙ ජානං පුබ්බූපගතං භික්ඛුනිං අනුපඛජ්ජ සෙය්‍යං කප්පෙය්‍ය ‘යස්සා සම්බාධො භවිස්සති, සා පක්කමිස්සතී’ති. එතදෙව පච්චයං කරිත්වා අනඤ්ඤං, පාචිත්තියං.
7. යා පන භික්ඛුනී භික්ඛුනිං කුපිතා අනත්තමනා සංඝිකා විහාරා නික්කඩ්ඪෙය්‍ය වා නික්කඩ්ඪාපෙය්‍ය වා, පාචිත්තියං.
8. යා පන භික්ඛුනී සංඝිකෙ විහාරෙ උපරිවෙහාසකුටියා ආහච්චපාදකං මඤ්චං වා පීඨං වා අභිනිසීදෙය්‍ය වා, අභිනිප්පජ්ජෙය්‍ය වා, පාචිත්තියං.
9. මහල්ලකං පන භික්ඛුනියා විහාරං කාරයමානාය යාවද්වාරකොසා අග්ගලට්ඨපනාය ආලොකසන්ධිපරිකම්මාය ද්වත්තිච්ඡදනස්ස පරියායං අප්පහරිතෙ ඨිතාය අධිට්ඨාතබ්බං. තතො චෙ උත්තරි අප්පහරිතෙපි ඨිතා අධිට්ඨහෙය්‍ය, පාචිත්තියං.
10. යා පන භික්ඛුනී ජානං සප්පාණකං උදකං තිණං වා මත්තිකං වා සිඤ්චෙය්‍ය වා සිඤ්චාපෙය්‍ය වා, පාචිත්තියං.
භූතගාමවග්ගො එකදසමො.
1. අගිලානාය භික්ඛුනියා එකො ආවසථ පිණ්ඩො භුඤ්ජිතබ්බො, තතො චෙ උත්තරි භුඤ්ජෙය්‍ය, පාචිත්තියං.
2. ගණභොජනෙ අඤ්ඤත්‍ර සමයා පාචිත්තියං. තත්ථායං සමයො, ගිලාන සමයො චීවරදාන සමයො චීවරකාර සමයො අද්ධානගමන සමයො නාවාභිරූහන සමයො මහා සමයො සමණභත්ත සමයො. අයං තත්ථ සමයො.
3. භික්ඛුනිං පනෙව කුලං උපගතං පූවෙහි වා මන්ථෙහි වා අභිහට්ඨුං පවාරෙය්‍ය, ආකංඛමානාය භික්ඛුනියා ද්වත්තිපත්තපූරා පටිග්ගහෙතබ්බා. තතො චෙ උත්තරි පටිග්ගණ්හෙය්‍ය, පාචිත්තියං. ද්වත්තිපත්තපූරෙ පටිග්ගහෙත්වා තතො නීහරිත්වා භික්ඛුනීහි සද්ධිං සංවිභජිතබ්බං, අයං තත්ථ සාමීචි.
4. යා පන භික්ඛුනී විකාලෙ ඛාදනීයං වා භොජනීයං වා ඛාදෙය්‍ය වා භූඤ්ජෙය්‍ය වා, පාචිත්තියං.
5. යා පන භික්ඛුනී සන්නිධිකාරකං ඛාදනීයං වා භොජනීයං වා ඛාදෙය්‍ය වා භුඤ්ජෙය්‍ය වා, පාචිත්තියං.
6. යා පන භික්ඛුනී අදින්නං මුඛද්වාරං ආහාරං ආහරෙය්‍ය අඤ්ඤත්‍ර උදකදන්තපොනා, පාචිත්තියං.
7. යා පන භික්ඛුනී භික්ඛුනිං[4] ‘එහාය්‍යෙ ගාමං වා නිගමං වා පිණ්ඩාය පවිසිස්සාමා’ති, තස්සා දාපෙත්වා වා අදාපෙත්වා වා උය්‍යොජෙය්‍ය ‘ගච්ඡෙය්‍ය, න මෙ තයා සද්ධිං කථා වා නිසජ්ජා වා ඵාසු හොති, එකකාය මෙ කථා වා නිසජ්ජා වා පාසුහොතී’ති එතදෙව පච්චයං කරිත්වා අනඤ්ඤං, පාචිත්තියං.
8. යා පන භික්ඛුනී සභොජනෙකුලෙ අනුපඛජ්ජ නිසජ්ජං කප්පෙය්‍ය, පාචිත්තියං.
9. යා පන භික්ඛුනී පුරිසෙන සද්ධිං රහො පටිච්ඡන්නෙ ආසනෙ නිසජ්ජං කප්පෙය්‍ය, පාචිත්තියං.
10. යා පන භික්ඛුනී පුරිසෙන සද්ධිං එකෙනෙකා රහො නිසජ්ජං කප්පෙය්‍ය, පාචිත්තියං.
භොජනවග්ගො ද්වාදසමො.
1. යා පන භික්ඛුනිං නිමන්තිතා සභත්තා සමානා සන්තිං භික්ඛුනිං අනාපුච්ඡා පුරෙභත්තං වා පච්ඡාභත්තං වා කුලෙසු චාරිත්තං ආපජ්ජෙය්‍ය අඤ්ඤත්‍ර සමයා පාචිත්තියං. තත්ථායං සමයො; චීවරදානසමයො චීවරකාරසමයො. අයං තත්ථ සමයො.
2. අගිලානාය භික්ඛුනියා චතුමාසප්පච්චය පවාරණා සාදිතබ්බා අඤ්ඤත්‍ර පුනපවාරණාය අඤ්ඤත්‍ර නිච්චපවාරණාය. තතො චෙ උත්තරි සාදියෙය්‍ය, පාචිත්තියං.
3. යා පන භික්ඛුනී උය්‍යුත්තං සෙනං දස්සනාය ගච්ඡෙය්‍ය අඤ්ඤත්‍ර තථාරූපප්පච්චයා, පාචිත්තියං.
4. සියා ච තස්සා භික්ඛුනියා කොචිදෙව පච්චයො සෙනං ගමනාය, දිරත්ත තිරත්තං තාය භික්ඛුනියා සෙනාය වසිතබ්බං. තතො චෙ උත්තරි වසෙය්‍ය, පාචිත්තියං.
5. දිරත්ත තිරත්තං චෙ භික්ඛුනී සෙනාය වසමානා උය්‍යොධිකං වා බලග්ගං වා සෙනාඛ්‍යුහං වා අනීකදස්සනං වා ගච්ඡෙය්‍ය, පාචිත්තියං.
6. සුරාමෙරය පානෙ පාචිත්තියං.
7. අංගුලිපතොදකෙ පාචිත්තියං.
8. උදකෙ හස්සධම්මෙ පාචිත්තියං.
9. අනාදරියෙ පාචිත්තියං.
10. යා පන භික්ඛුනී භික්ඛුනිං හිංසාපෙය්‍ය, පාචිත්තියං.
චාරිත්තවග්ගො තෙරසමො.
1. යා පන භික්ඛුනී අගිලානා විසිබ්බනාපෙක්ඛා ජොතිං සමාදහෙය්‍ය වා සමාදහාපෙය්‍ය වා අඤ්ඤත්‍ර තථාරූපප්පච්චයා, පාචිත්තියං.
2. යා පන ‘භික්ඛුනී ඔරෙනද්ධමාසං නහායෙය්‍ය අඤ්ඤත්‍ර සමයා, පාචිත්තියං. තත්ථායං සමයො, දියඩ්ඪො මාසො සෙසො ගිම්හානන්ති වස්සානස්ස පඨමො මාසො ඉච්චෙතෙ අඩ්ඪතෙය්‍යමාසා, උණ්හසමයො පරිළාහසමයො ගිලානසමයො කම්මසමයො අද්ධාන ගමනසමයො වාතවුට්ඨිසමයො. අයං තත්ථ සමයො.
3. නවං පන භික්ඛුනියා චීවරලාභාය තිණ්ණං දුබ්බණ්ණකරණානං අඤ්ඤතරං දුබ්බණ්ණකරණං ආදාතබ්බං නීලං වා කද්දමං වා කාළසාමං වා. අනාදා චෙ භික්ඛුනී තිණ්ණං දුබ්බණ්ණකරණානං අඤ්ඤතරං දුබ්බණ්ණකරණං නවං චීවරං පරිභුඤ්ජෙය්‍ය, පාචිත්තියං.
4. යා පන භික්ඛුනී භික්ඛුස්ස වා භික්ඛුනියා වා සික්ඛමානාය වා සාමණෙරස්ස වා සාමණෙරියා වා සාමං චීවරං විකප්පෙත්වා අප්පච්චුද්ධාරණං පරිභුඤ්ජෙය්‍ය, පාචිත්තියං.
5. යා පන භික්ඛුනී භික්ඛුනියා පත්තං වා චීවරං වා නිසීදනං වා සූචිඝරං වා කාය බන්ධනං වා අපනිධෙය්‍ය වා අපනිධාපෙය්‍ය වා අන්තමසො හසාපෙක්ඛො පි, පාචිත්තියං.
6. යා පන භික්ඛුනී සංචිච්ච පාණං ජීවිතා වොරොපෙය්‍ය, පාචිත්තියං.
7. යා පන භික්ඛුනී ජානං සප්පාණකං උදකං පරිභුඤ්ජෙය්‍ය, පාචිත්තියං.
8. යා පන භික්ඛුනී ජානං යථා ධමමං නිහතාධිකරණං පුනකම්මාය උක්කොටෙය්‍ය, පාචිත්තියං.
9. යා පන භික්ඛුනී ජානං ථෙය්‍යසත්ථෙන සද්ධිං සංවිධාය එකද්ධානමග්ගං පටිපජ්ජෙය්‍ය අන්තමසො ගාමන්තරම්පි, පාචිත්තියං.
10. යා පන භික්ඛුනී එවං වදෙය්‍ය, ‘තථාහං භගවතා ධම්මං දෙසිතං ආජානාමි, යථා යෙ මෙ අන්තරායිකා ධම්මා වුත්තා භගවතා තෙ පටිසෙවතො නාලං අන්තරායායා’ති. සා භික්ඛුනී භික්ඛුනීහි එවමස්ස වචනීයා ‘මාය්‍යෙ එවං අවච, මා භගවන්තං අබ්භාචික්ඛි, න හි සාධු භගවතො අබ්භක්ඛානං, නහි භගවා එවං වදෙය්‍ය, අනෙකපරියායෙන අය්‍යෙ අන්තරායිකා ධම්මා අන්තරායිකා වුත්තා භගවතා, අලංච පන තෙ පටිසෙවතො අන්තරායායා’ති. එවං ච පන සා භික්ඛුනී භික්ඛුනීහි වුච්චමානා තථෙව පග්ගණ්හෙය්‍ය, සා භික්ඛුනී භික්ඛුනීහි යාව තතියං සමනුභාසිතබ්බා තස්ස පටිනිස්සග්ගාය. යාවතතියං චෙ සමනුභාසියමානා තං පටිනිස්සජ්ජෙය්‍ය, ඉච්චෙතං කුසලං. නො චෙ පටිනිස්සජ්ජෙය්‍ය, පාචිත්තියං.
ජොතිවග්ගො චතුද්දසමො
1. යා පන භික්ඛුනී ජානං තථාවාදිනියා භික්ඛුනියා අකතානු ධම්මාය තං දිට්ඨිං අප්පටිනිස්සට්ඨාය සද්ධිං සම්භුඤ්ජෙය්‍ය වා සංවසෙය්‍ය වා සහ වා සෙය්‍යං කප්පෙය්‍ය, පාචිත්තියං.
2. සමණුද්දෙසා පි චෙ එවං වදෙය්‍ය, ‘තථාහං භගවතා ධම්මං දෙසිතං ආජානාමි යථා යෙ මෙ අන්තරායිකා ධම්මා අන්තරායිකා වුත්තා භගවතා තෙ පටිසෙවතො නාලං අන්තරායායා’ති. සා සමණුද්දෙසා භික්ඛුනීහි එවමස්ස වචනීයා, ‘මාය්‍යෙ සමණුද්දෙසෙ එවං අවච, මා භගවන්තං අබ්භාචික්ඛි, න හි සාධු භගවතො අබ්භක්ඛානං, නහි භගවා එවං වදෙය්‍ය, අනෙක පරියායෙන අය්‍යෙ සමණුද්දෙසෙ අන්තරායිකා ධම්මා අන්තරායිකා වුත්තා භගවතා, අලං ච පන තෙ පටිසෙවතො අන්තරායායා’ති. එවං ච සා සමණුද්දෙසා භික්ඛුනීහි වුච්චමානා තථෙව පග්ගණ්හෙය්‍ය, සා සමණුද්දෙසා භික්ඛුනීහි එවමස්ස වචනීයා ‘අජ්ජතග්ගෙ තෙ අය්‍යෙ සමණුද්දෙසෙ නචෙව සො භගවා සත්ථා අපදිසිතබ්බො, යං පි චඤ්ඤා සමණුද්දෙසා ලභන්ති භික්ඛුනීහි සද්ධිං දිරත්ත තිරත්තං සහසෙය්‍යා, සා පි තෙ නත්ථි, චර පිරෙ විනස්සා’ති. යා පන භික්ඛුනී ජානං තථා නාසිතං සමණුද්දෙසං උපලාපෙය්‍ය වා උපට්ඨාපෙය්‍ය වා සම්භුඤ්ජෙය්‍ය වා සහ වා සෙය්‍යං කප්පෙය්‍ය, පාචිත්තියං.
3. යා පන භික්ඛුනී භික්ඛුනීහි සහධම්මිකං වුච්චමානා එවං වදෙය්‍ය ‘න තාවාහං අය්‍යෙ එතස්මිං සික්ඛාපදෙ සික්ඛිස්සාමි, යාව න අඤ්ඤං භික්ඛුනිං ව්‍යත්තං විනයධරං පරිපුච්ඡාමී’ති, පාචිත්තියං. සික්ඛමානාය භික්ඛවෙ භික්ඛුනියා අඤ්ඤාතබ්බං පරිපුච්ඡිතබ්බං පරිපඤ්හිතබ්බං. අයං තත්ථ සාමීචි.
4. යා පන භික්ඛුනී පාතිමොක්ඛෙ උද්දිස්සමානෙ එවං වදෙය්‍ය ‘කිං පනිමෙහි ඛුද්දානුඛුද්දකෙහි සික්ඛාපදෙහි උද්දිට්ඨෙහි, යාවදෙව කුක්කුච්චාය විහෙසාය විලෙඛාය සංවත්තන්තී’ති සික්ඛාපද විවණ්ණකෙ, පාචිත්තියං.
5. යා පන භික්ඛුනී අන්වද්ධමාසං පාතිමොක්ඛෙ උද්දිස්සමානෙ එවං වදෙය්‍ය ‘ඉදානෙව ඛො අහං ජානාමි අයම්පි කිර ධම්මො සුත්තාගතො සුත්තපරියාපන්නො අන්වද්ධමාසං උද්දෙසං ආගච්ඡතී’ති. තඤ්චෙ භික්ඛුනිං අඤ්ඤා භික්ඛුනියො ජානෙය්‍යුං නිසින්නපුබ්බං ඉමාය භික්ඛුනියා ද්වත්තික්ඛත්තුං පාතිමොක්ඛෙ උද්දිස්සමානෙ, කො පන වාදො භීය්‍යො, න ච තස්සා භික්ඛුනියා අඤ්ඤාණකෙන මුත්ති අත්ථි. යඤ්ච තත්ථ ආපත්තිං ආපන්නා, තඤ්ච යථාධම්මො කාරෙතබ්බො. උත්තරි චස්සා මොහො ආරොපෙතබ්බො. ‘තස්සා තෙ අය්‍යෙ අලාභා තස්සා තෙ දුල්ලද්ධං, යං ත්වං පාතිමොක්ඛෙ උද්දිස්සමානෙ න සාධුකං අට්ඨිං කත්වා මනසිකරොසී’ති. ඉදං තස්මිං මොහනකො, පාචිත්තියං.
6. යා පන භික්ඛුනී භික්ඛුනියා කුපිතා අනත්තමනා පහාරං දදෙය්‍ය, පාචිත්තියං.
7. යා පන භික්ඛුනී භික්ඛුනියා කුපිතා අනත්තමනා තලසත්තිකං උග්ගිරෙය්‍ය, පාචිත්තියං.
8. යා පන භික්ඛුනී භික්ඛුනිං අමූලකෙන සංඝාදිසෙසෙන අනුද්ධංසෙය්‍ය, පාචිත්තියං.
9. යා පන භික්ඛුනී භික්ඛුනියා සඤ්චිච්ච කුක්කුච්චං උපදහෙය්‍ය ‘ඉතිස්සාමුහුත්තම්පි අඵාසු භවිස්සතී’ති එතදෙව පච්චයං කරිත්වා අනඤ්ඤං, පාචිත්තියං.
10. යා පන භික්ඛුනී භික්ඛුනීනං භණ්ඩනජාතානං කලහජාතානං විවාදාපන්නානං උපස්සුතිං තිට්ඨෙය්‍ය ‘යං ඉමා භණිස්සන්ති තං සොස්සාමී’ති එතදෙව පච්චයං කරිත්වා අනඤ්ඤං, පාචිත්තියං.
දිට්ඨිවග්ගො පණ්ණරසමො
1. යා පන භික්ඛුනී ධම්මිකානං කම්මානං ඡන්දං දත්වා පච්ඡා ඛීයනධම්මං ආපජ්ජෙය්‍ය, පාචිත්තියං.
2. යා පන භික්ඛුනී සංඝෙ විනිච්ඡය කථාය වත්තමානාය ඡන්දං අදත්වා උට්ඨායාසනා පක්කමෙය්‍ය, පාචිත්තියං.
3. යා පන භික්ඛුනී සමග්ගෙන සංඝෙන චීවරං දත්වා පච්ඡා ඛීයනධම්මං ආපජ්ජෙය්‍ය, යථාසන්ථුතං භික්ඛුනියො සංඝිකං ලාභං පරිණාමෙන්තී ති, පාචිත්තියං.
4. යා පන භික්ඛුනී ජානං සංඝිකං ලාභං පරිණතං පුග්ගලස්ස පරිණාමෙය්‍ය, පාචිත්තියං.
5. යා පන භික්ඛුනී රතනං වා රතනසම්මතං වා අඤ්ඤත්‍ර අජ්ඣාරාමා වා අජ්ඣාවසථා වා උග්ගණ්හෙය්‍ය වා උග්ගණ්හාපෙය්‍ය වා, පාචිත්තියං. රතනං වා පන භික්ඛුනියා රතනසම්මතං වා අජ්ඣාරාමෙ වා අජ්ඣාවසථෙ වා උග්ගහෙත්වා වා උග්ගහාපෙත්වා වා නික්ඛිපිතබ්බං, ‘යස්ස භවිස්සති සො හරිස්සතී’ති. අයං තත්ථ සාමීචි.
6. යා පන භික්ඛුනී අට්ඨිමයං වා දන්තමයං වා විසාණමයං වා සූචිඝරං කාරාපෙය්‍ය, ඡෙදනකං පාචිත්තියං.
7. යා පන භික්ඛුනියා මඤ්චං වා පීඨං වා කාරයමානාය අට්ඨංගුල පාදකං කාරෙතබ්බං සුගතංගුලෙන අඤ්ඤත්‍ර හෙට්ඨිමාය අටනියා. තං අතික්කාමෙන්තියා, ඡෙදනකං පාචිත්තියං.
8. යා පන භික්ඛුනී මඤ්චං වා පීඨං වා තූලොනද්ධං කාරාපෙය්‍ය, උද්දාලනකං පාචිත්තියං.
9. කණ්ඩුපටිච්ඡාදිං පන භික්ඛුනියා කාරයමානාය පමාණිකා කාරෙතබ්බා. තත්‍රිදං පමාණං: දීඝසො චතස්සො විදත්ථියො සුගතවිදත්ථියා, තිරියං ද්වෙ විදත්ථිායො, තං අතික්කාමෙන්තියා ඡෙදනකං පාචිත්තියං.
10. යා පන භික්ඛුනී සුගතචීවරප්පමාණං චීවරං කාරාපෙය්‍ය අතිරෙකං වා ඡෙදනකං පාචිත්තියං. තත්‍රිදං සුගතස්ස සුගතචීවරප්පමාණං: දීඝසො නව විදත්ථියො සුගත විදත්ථියා, තිරියං ඡ විදත්ථියො. ඉදං සුගතස්ස සුගතවීවරප්පමාණං.
ධම්මිකවග්ගො සොළසමො.
උද්දිට්ඨා ඛො අය්‍යායො ඡසට්ඨිසතා පාචිත්තියා ධම්මා, තත්ථාය්‍යායො පුච්ඡාමි, කච්චිත්ථ පරිසුද්ධා? දුතියම්පි පුච්ඡාමි, කච්චිත්ථ පරිසුද්ධා? තතියම්පි පුච්ඡාමි, කච්චිත්ථ පරිසුද්ධා? පරිසුද්ධෙත්ථාය්‍යායො, තස්මා තුණ්හී, එවමෙතං ධාරායාමීති.
ඡසට්ඨිසතා පාචිත්තියා නිට්ඨිතා.