නමො තස්ස භගවතො අරහතො සම්මා සම්බුද්ධස්ස
සම්මජ්ජනී පදීපො ච
උදකං ආසනෙන ච
උපොසථස්ස එතානි
පුබ්බකරණන්ති වුච්චති.
.
ඡන්ද පාරිසුද්ධි උතුක්ඛානං
භික්ඛුනී ගණනා ච ඔවාදො
උපොසථස්ස එතානි
පුබ්බකිච්චන්ති වුච්චති.
.
උපොසථො යාවතිකා ච භික්ඛුනියො
කම්මප්පත්තා සභාගාපත්තියො ච
න විජ්ජන්ති වජ්ජනීයා ච පුග්ගලා
තස්මිං න හොන්ති පත්තකල්ලන්ති වුච්චති.
පුබ්බකරණ පුබ්බකිච්චානි සමාපෙත්වා දෙසිතාපත්තිකස්ස සමග්ගස්ස භික්ඛුනී සංඝස්ස අනුමතියා පාතිමොක්ඛං උද්දිසිතුං ආරාධනං කරොම.
සුණාතු මෙ අය්‍යෙ සංඝො, අජ්ජුපොසථො පණ්ණරසො. යදි සංඝස්ස පත්තකල්ලං, සංඝො උපොසථං කරෙය්‍ය, පාතිමොක්ඛං උද්දිසෙය්‍ය.
කිං සංඝස්ස පුබ්බකිච්චං? පාරිසුද්ධං අය්‍යායො ආරොචෙථ. පාතිමොක්ඛං උද්දිසිස්සාමි. තං සබ්බාව සන්තා සාධුකං සුණොම මනසිකරොම. යස්සා සියා ආපත්ති සා ආවිකරෙය්‍ය. අසන්තියා ආපත්තියා තුණ්හී භවිතබ්බං, තුණ්හීභාවෙන ඛො පනාය්‍යායො පරිසුද්ධාති වෙදිස්සාමි. යථා ඛො පන පච්චෙකපුට්ඨාය වෙය්‍යාකරණං හොති.
එවමෙවං එවරූපාය පරිසාය යාවතතියං අනුසාවිතං හොති. යා පන භික්ඛුනී යාවතතියං අනුසාවියමානෙ සරමානා සන්තිං ආපත්තිං නාවිකරෙය්‍ය, සම්පජාන මුසාවාදස්සා හොති, සම්පජාන මුසාවාදො ඛො පනාය්‍යායො අන්තරායිකො ධම්මො වුත්තො භගවතා. තස්මා සරමානාය භික්ඛුනියා ආපන්නාය විසුද්ධාපෙක්ඛාය සන්ති ආපත්ති ආවිකාතබ්බා. අවිකතාහිස්සා ඵාසු හොති.
උද්දිට්ඨං ඛො අය්‍යායො නිදානං. තත්ථාය්‍යායො පුච්ඡාමි, කච්චිත්ථ පරිසුද්ධා? දුතියම්පි පුච්ඡාමි, කච්චිත්ථ පරිසුද්ධා? තතියම්පි පුච්ඡාමි, කච්චිත්ථ පරිසුද්ධා? පරිසුද්ධෙත්ථාය්‍යායො, තස්මා තුණ්හී. එවමෙතං ධාරායාමීති.
නිදානුද්දෙසො පඨමො